ಕನ್ನಡದ ಮನೆಮನಕ್ಕೆ ಸಾಹಿತ್ಯ ತಲುಪಿಸಿದ ಗಳಗನಾಥರು ಸ್ಮರಣೀಯ: ಡಾ. ಜಯಂತ ಕಿತ್ತೂರು

03 Feb, 2026

ಬೆಳಗಾವಿ: "ಆರ್ಥಿಕ ಸಂಕಷ್ಟದ ನಡುವೆಯೂ ಪುಸ್ತಕಗಳನ್ನು ಬರೆದು, ಮುದ್ರಿಸಿ, ಮನೆಮನೆಗೆ ಹೊತ್ತೊಯ್ದು ಮಾರಾಟ ಮಾಡುವ ಮೂಲಕ ಜನರಲ್ಲಿ ಸಾಹಿತ್ಯದ ಅಭಿರುಚಿ ಬೆಳೆಸಿದ ಗಳಗನಾಥರ ಸಾಧನೆ ಅನನ್ಯ," ಎಂದು ನಿವೃತ್ತ ಪ್ರಾಧ್ಯಾಪಕ ಡಾ. ಜಯಂತ ಕಿತ್ತೂರು ಬಣ್ಣಿಸಿದರು.

ನಗರದ ಕನ್ನಡ ಸಾಹಿತ್ಯ ಭವನ ವಿಶ್ವಸ್ತ ಮಂಡಳಿಯು ಹಮ್ಮಿಕೊಂಡಿದ್ದ ‘ಮರೆಯಲಾಗದ ಮಹನೀಯರು’ ಮಾಸಿಕ ಉಪನ್ಯಾಸ ಮಾಲಿಕೆಯಲ್ಲಿ ಅವರು ಮಾತನಾಡುತ್ತಿದ್ದರು.

ಶತಮಾನ ಕಂಡ ಸಾಧನೆ: "ಗಳಗನಾಥರು 19ನೇ ಶತಮಾನದಲ್ಲೇ 'ಸದ್ಬೋಧ ಚಂದ್ರಿಕೆ' ಪತ್ರಿಕೆಯನ್ನು ಆರಂಭಿಸಿ, ಸಾವಿರಕ್ಕೂ ಹೆಚ್ಚು ಚಂದಾದಾರರನ್ನು ಹೊಂದುವಂತೆ ಮಾಡಿದ್ದರು. ಆ ಪತ್ರಿಕೆಯು ಸತತ ಒಂದು ಶತಮಾನ ಕಾಲ ನಡೆದಿರುವುದು ಸಾಹಿತ್ಯ ಲೋಕದ ವಿಶೇಷ ಸಾಧನೆ" ಎಂದು ಕಿತ್ತೂರು ಸ್ಮರಿಸಿದರು.

ಇದೇ ಸಂದರ್ಭದಲ್ಲಿ ಶ್ರೀಮತಿ ಮಮತಾ ಶಂಕರ ಅವರು ಕವಿ ಸು.ರಂ. ಯಕ್ಕುಂಡಿ ಅವರ ಕುರಿತು ಹಾಗೂ ಪ್ರೊ. ಇಂದಿರಾ ಹೋಳಕರ ಅವರು ಖ್ಯಾತ ಕಾದಂಬರಿಕಾರ್ತಿ ಎಂ.ಕೆ. ಇಂದಿರಾ ಅವರ ಜೀವನ ಮತ್ತು ಸಾಹಿತ್ಯದ ಕುರಿತು ವಿಶೇಷ ಉಪನ್ಯಾಸ ನೀಡಿದರು.

ಸಂಗೀತದ ಸೊಗಡು: ಉಪನ್ಯಾಸದ ನಂತರ ನಡೆದ ಸಾಂಸ್ಕೃತಿಕ ಕಾರ್ಯಕ್ರಮದಲ್ಲಿ ಸಪ್ತಸ್ವರ ಸಂಗೀತ ವಿದ್ಯಾಲಯದ ನಿರ್ಮಲಾ ಪ್ರಕಾಶ್ ಮತ್ತು ವಿದುಷಿ ಮಂಜುಳಾ ಜೋಶಿ ಅವರು ವರಕವಿ ದ.ರಾ. ಬೇಂದ್ರೆಯವರ ಕನ್ನಡ ಬಂದಿಶ್, ಭಾವಗೀತೆ ಹಾಗೂ ಯಕ್ಕುಂಡಿಯವರ ಕವನಗಳನ್ನು ಸುಶ್ರಾವ್ಯವಾಗಿ ಹಾಡಿದರು. ನಾರಾಯಣ ಗಣಾಚಾರಿ (ತಬಲಾ) ಮತ್ತು ಮುಕುಂದ ಗೋರೆ (ಹಾರ್ಮೋನಿಯಂ) ಸಾಥ್ ನೀಡಿದರು. ಸಂಗೀತಜ್ಞ ಶಿರೀಷ ಜೋಶಿ ಬೇಂದ್ರೆ ಸಂಗೀತದ ವಿಶಿಷ್ಟತೆಯನ್ನು ವಿವರಿಸಿದರು.

ಚುಟುಕು ಸಾಹಿತ್ಯ ಪರಿಷತ್ ಅಧ್ಯಕ್ಷ ಎಲ್.ಎಸ್. ಶಾಸ್ತ್ರಿ ಕಾರ್ಯಕ್ರಮ ನಿರೂಪಿಸಿದರು. ವೇದಿಕೆಯಲ್ಲಿ ಶ್ರೀ ಆರ್.ಬಿ. ಕಟ್ಟಿ, ಡಾ. ಸಿ.ಕೆ. ಜೋರಾಪುರ ಉಪಸ್ಥಿತರಿದ್ದರು. ಆನಂದ ಪುರಾಣಿಕ ವಂದಿಸಿದರು. ಕಾರ್ಯಕ್ರಮದಲ್ಲಿ ಪ್ರಕಾಶ ಅಯ್ಯರ್, ಜಯಂತ್ ಜೋಶಿ ಸೇರಿದಂತೆ ಹಲವು ಸಾಹಿತ್ಯಾಸಕ್ತರು ಭಾಗವಹಿಸಿದ್ದರು.

ಗಳಗನಾಥರ ಕಾಯಕ ದೊಡ್ಡದು
"ಸೌಲಭ್ಯಗಳಿಲ್ಲದ ಕಾಲದಲ್ಲಿ ಕೇವಲ ಸಾಹಿತ್ಯದ ಮೇಲಿನ ಪ್ರೀತಿಯಿಂದ ಜನರನ್ನು ಸಾಹಿತ್ಯದತ್ತ ಸೆಳೆದ ಗಳಗನಾಥರ ಬದುಕು ಇಂದಿನ ಪೀಳಿಗೆಗೆ ಮಾದರಿ. ಸಾಹಿತ್ಯ ಸೇವೆಯೇ ಅವರ ಜೀವನದ ಉಸಿರಾಗಿತ್ತು."
- ಡಾ. ಜಯಂತ ಕಿತ್ತೂರು

Publisher: ಕನ್ನಡ ನಾಡು | Kannada Naadu