ಬೆಂಗಳೂರು ಚಿತ್ರೋತ್ಸವದಲ್ಲಿ ವ್ಯವಸ್ಥೆಯ ವಿರುದ್ಧದ ಹೋರಾಟದ ಕಥೆ 'ಎ ಪ್ರೆಗ್ನೆಂಟ್ ವಿಡೋ'ಗೆ ಭರ್ಜರಿ ರೆಸ್ಪಾನ್ಸ್

31 Jan, 2026

ಬೆಂಗಳೂರು : ಸಿಲಿಕಾನ್ ಸಿಟಿಯಲ್ಲಿ ನಡೆಯುತ್ತಿರುವ 17ನೇ ಬೆಂಗಳೂರು ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವದ (BIFFES) ಅಂಗಳದಲ್ಲಿ ಮಲಯಾಳಂನ ಅತ್ಯಂತ ಚರ್ಚಿತ ಸಿನಿಮಾ ‘ಎ ಪ್ರೆಗ್ನೆಂಟ್ ವಿಡೋ’ (A Pregnant Widow) ಶನಿವಾರ ಅದ್ಧೂರಿಯಾಗಿ ಪ್ರದರ್ಶನಗೊಂಡಿತು. ತನ್ನ ವಿಭಿನ್ನ ಕಥಾವಸ್ತು ಹಾಗೂ ಸಾಮಾಜಿಕ ಕಾಳಜಿಯ ಮೂಲಕ ಈ ಚಿತ್ರವು ಗಣ್ಯರು ಹಾಗೂ ಸಿನಿಮಾ ರಸಿಕರ ಗಮನ ಸೆಳೆಯುವಲ್ಲಿ ಯಶಸ್ವಿಯಾಗಿದೆ.

ಉನ್ನಿ ಕೆ.ಆರ್. ನಿರ್ದೇಶನದ ಈ ಚಿತ್ರವು ಒಬ್ಬ ಮಹಿಳೆಯ ಅಸಹಾಯಕತೆ ಮತ್ತು ಆಕೆಯ ಅದಮ್ಯ ಹೋರಾಟದ ಬದುಕನ್ನು ತೆರೆಯ ಮೇಲೆ ತಂದಿದೆ. ಸರ್ಕಾರಿ ಉದ್ಯೋಗಿಯಾಗಿದ್ದ ಪತಿಯನ್ನು ಕಳೆದುಕೊಂಡ ಏಳು ತಿಂಗಳ ಗರ್ಭಿಣಿಯೊಬ್ಬಳು, ತನಗಾಗುವ ಅನ್ಯಾಯದ ವಿರುದ್ಧ ವ್ಯವಸ್ಥೆಯ ಜೊತೆ ಹೇಗೆ ಸೆಣಸಾಡುತ್ತಾಳೆ ಎಂಬುದೇ ಈ ಚಿತ್ರದ ತಿರುಳು. ಜಾತಿ, ಬಣ್ಣ ಮತ್ತು ಸಾಮಾಜಿಕ ತಾರತಮ್ಯದಂತಹ ಕಠಿಣ ಸತ್ಯಗಳನ್ನು ಚಿತ್ರವು ಅತ್ಯಂತ ಪರಿಣಾಮಕಾರಿಯಾಗಿ ಕಟ್ಟಿಕೊಟ್ಟಿದೆ.

ಈಗಾಗಲೇ ಕೋಲ್ಕತ್ತಾ, ಪುಣೆ, ಚೆನ್ನೈ ಹಾಗೂ ಶ್ರೀಲಂಕಾದಂತಹ ಪ್ರತಿಷ್ಠಿತ ಅಂತರರಾಷ್ಟ್ರೀಯ ಚಿತ್ರೋತ್ಸವಗಳಲ್ಲಿ ಪ್ರಶಂಸೆ ಗಳಿಸಿರುವ ಈ ಸಿನಿಮಾ, ಈಗ ಬೆಂಗಳೂರಿನಲ್ಲೂ ಸಂಚಲನ ಮೂಡಿಸಿದೆ. ಪ್ರದರ್ಶನದ ನಂತರ ಚಿತ್ರತಂಡದ ಸದಸ್ಯರು ಸಿನಿಪ್ರಿಯರ ಜೊತೆ ಸಂವಾದ ನಡೆಸಿ ತಮ್ಮ ಅನುಭವಗಳನ್ನು ಹಂಚಿಕೊಂಡರು.

ಚಿತ್ರದ ನಾಯಕಿ ಟ್ವಿಂಕಲ್ ಜೋಬಿ ಮಾತನಾಡಿ, "ಬೆಂಗಳೂರು ಚಿತ್ರೋತ್ಸವದಂತಹ ದೊಡ್ಡ ವೇದಿಕೆಯಲ್ಲಿ ನಮ್ಮ ಸಿನಿಮಾ ಪ್ರದರ್ಶನಗೊಂಡಿರುವುದು ಹೆಮ್ಮೆಯ ವಿಷಯ. ನಾನು ನಿರ್ವಹಿಸಿದ ಪಾತ್ರಗಳಲ್ಲಿ ಇದು ಅತ್ಯಂತ ಶಕ್ತಿಯುತವಾದುದು," ಎಂದು ಸಂತಸ ಹಂಚಿಕೊಂಡರು. ಒಟ್ಟಾರೆಯಾಗಿ, ಸಾಂಸ್ಥಿಕ ಅನ್ಯಾಯಗಳ ಮೇಲೆ ಬೆಳಕು ಚೆಲ್ಲುವ ‘ಎ ಪ್ರೆಗ್ನೆಂಟ್ ವಿಡೋ’ ಚಿತ್ರೋತ್ಸವದ ಹೈಲೈಟ್‌ಗಳಲ್ಲಿ ಒಂದಾಗಿ ಹೊರಹೊಮ್ಮಿದೆ.

"ಸಮಾಜದ ಕಣ್ಣು ತೆರೆಸುವ ಪ್ರಯತ್ನ ನಮ್ಮ ಚಿತ್ರ" – ನಿರ್ದೇಶಕ ಉನ್ನಿ ಕೆ.ಆರ್. ಅಭಿಮತ  "ಇದು ಸರ್ಕಾರದ ವಿರುದ್ಧದ ಸಿನಿಮಾವಲ್ಲ, ಬದಲಿಗೆ ದುರ್ಬಲ ವ್ಯಕ್ತಿಗಳನ್ನು ಕಡೆಗಣಿಸುವ ಕಠಿಣ ವ್ಯವಸ್ಥೆಯ ವಿರುದ್ಧದ ಪ್ರಶ್ನೆ. ಅಧಿಕೃತ ದಾಖಲೆಗಳಿಗಾಗಿ ಹರಸಾಹಸ ಪಡುವ ಗರ್ಭಿಣಿ ಮಹಿಳೆಯ ಹೋರಾಟದ ಮೂಲಕ ನಾವು ಸಮಾಜದ ಕಣ್ಣು ತೆರೆಸುವ ಪ್ರಯತ್ನ ಮಾಡಿದ್ದೇವೆ."                                                                                      — ಉನ್ನಿ ಕೆ.ಆರ್., ನಿರ್ದೇಶಕರು

Publisher: ಕನ್ನಡ ನಾಡು | Kannada Naadu